Cronica
Cronica da la società da chatschaders Tardanna Sent
in occasiun dal giubileum da 50 ons
Compilada da Cla Sarott
Giubileum, 50 ons società da chatschaders
Gronda festa da giubileum in chasa da scoula Sent
dals 31 mai 2 gün 2002
La secziun da chatschaders "TARDANNA SENT es entrada illa società
chantunala ils 1 schner 1952. La nouv fuondada società es gnüda
batiada cul nom "TARDANNA SENT ed ha adüna in correspondenza
da gnir nomnada uschea.
Quai sta scrit pled per pled in nos prüm cudesch da protocols.
Che es vairamaing passà fin cha la "TARDANNA SENT es gnüda
fuondada? La dumengia dals 4 gün 1948 han divers chatschaders da
Sent discurrü da nossa bella e libra chatscha da patenta e sur da la
cultivaziun da tala.
Causa cha nos guardgiachatscha Andrea Werro vaiva survgni dal
chantun sal, per scumpartir a singuls chatschaders, gnit ventilà l"idea,
chi füss garanti pel bön da la chatscha, scha nossa sulvaschina,
impustüt ils chamuotschs gnissan cultivats e tgnüds in noss reviers.
Uschea hanna trais dis plü tard, als 7 gün 1948 invidà a mincha
chatschader da Sent persunalmaing ad üna radunanza generala cullas
seguaintas tractandas:
1. Metter sal in comuniun ed organisar quai
2. Ev. fuormar üna società da Sent culla mera
da mantegner il bun spiert
3. Provar da tgnair davent chatschaders esters
da noss reviers
4. Varia
20 persunas d"eiran preschaintas.
Ün pêr as vaivan s-chüsats ed alchüns mancaivan.
Id es gnü decis seguaintamaing:
In mincha revier sülla periferia stuvess gnir miss sal e quai in lös
favuraivels ed a l"averta, e na bun per schlupettar. Tuot ils sals dessan
esser cuntschaints a minchün, uschea cha interess privat nu po esser
avantman.
Il guardgiasulvaschina sto cugnuoscher mincha lö,
per ch"el possa controllar e scha la necessità dumonda, müdar.
Per metter ils sals sun gnüdas fuormadas gruppas ed a la testa da
mincha gruppa ün chi cugnuoscha bain la cuntrada.
Ils sals sün gnüts miss ils 11 lügl 1948. Mincha chatschader ha pajà
ün franc pel sal. Ils sals sun gnüts miss in 8 lös.
Lö dal sal Quantum gruppa
Uina e Mot 2 sals Polser Moggi, Peder Vital, Plasch Lansel, Mario Nogler
Davo Lais 1 sal Albert Werro, Konrad Benderei, Andrea Werro
Spadla-Soer 1 sal Jon Schnegg, Peder Benderer
Ils Blaus 1 sal Tinet Werro, Alfons Zanetti
Kuhtal-Uina 1 sal Konrad Benderer, Plasch Lansel, Jachen Zisler
Val Motana 1 sal Armon Taverna, Domenic Taverna, M. Vital, J. Friedt
S-chalambert 1 sal Jachen Mosca, Rico Guler
Total 8 sals, 20 chatschaders an mis a disposiziun
Quai chi reguarda la società es gnü decis da fuormar pel mumaint be
üna gruppa, da tgnair per insembel sco la rascha,
perche cha l"uniun fa la forza.
Plünavant da far dürant la stà üna spassegiada da cumpagnia.
Uschea hana fat üna spassegiada da cumpagnia ils 1 avuost.
Seguainta ruta: Sent Sur En Fil da Tramblai S-chalambert
Dadora S-chalambert Dadaint Val Torta Sur En.
Vis hanna daplü co 100 chamuotschs.
Cur chi sun rivats darcheu in cumün ardevan fingià ils lampiuns.
Dürant ils ons 30 existiva a Sent üna gruppa da chatschaders,
chi per dal 1941 ha fini dad exister, ils motivs nu tradischa il
cronist Chasper Werro, per i para chi mancaiva l"amicizcha e la paschiun.
L"inviern 1950/51 cullas grondas naiveras e la sgrischusa lavina
da Val Jüstina ha causà fich gronds problems a la sulvaschina,
chi ha eir pati fich ferm.
Üna radunanza extraordinaria ha decis da far starleras,
ca. 10 e pavlar fain, adüna darcheu frais-ch e da proteger
cunter il morder, la vuolp.
Las vuolps han sdrappà plü co 20 chavriöls be intuorn cumün.
Otras bes-chas d"eiran victimas da la fom ed otras malatias.
Ün inviern crudel e nosch.
Uschea as vaiva fuormà il spiert e paschaivelmaing
d"eiran tuots commembers da la gruppa da l"avis, cha"l temp saja
madür, per fuormar üna società da chatschaders sco secziun da
la società chantunala da chatschaders da patenta.
Il comitè d"eira il seguaint:
president, Chasper Werro
actuar e chaschier, Jachen Zisler
assessur, Polser Moggi
Grazcha fich per la fiduzcha ed a la nova società exclamain:
